Gaeilge

Tarraingítear d’aird ar imlitir 0028/2023 ‘Socruithe le haghaidh Chur Chun Feidhme an Chreata don tSraith Shóisearach le tagairt ar leith don scoilbhliain 2023/24’. Tuilleadh eolais anseo: https://tinyurl.com/2p8zp7nr

Cuireann CNCM fáilte roimh léiriú spéise ó mhúinteoirí Gaeilge iar-bhunscoile ar mhaith leo a bheith páirteach san athbhreithniú ar liostaí litríochta do Ghaeilge na Sraithe Sóisearaí T1 agus T2. Beidh an obair seo ar siúl ó Bhealtaine go Deireadh Fómhair 2023. Cuirtear fáilte roimh iarratais ó mhúinteoirí Gaeilge iar-bhunscoile a chomhlíonann na critéir seo a leanas ar fad:
·       fostaithe sa scoil chéanna ar feadh 3 bliana ar a laghad. 
·       taithí a bheith acu ar Ghaeilge T1 agus/nó T2 na Sraithe Sóisearaí a mhúineadh.
·       tiomantas a thabhairt freastal ar shraith cruinnithe idir Bealtaine agus Deireadh Fómhair 2023.
Más spéis leat a bheith páirteach san obair seo, comhlánaigh an fhoirm léirithe spéise atá ceangailte faoi 5 i.n. Déardaoin 25 Bealtaine. Déanfar roghnúcháin bunaithe ar thaithí ar mhúineadh Ghaeilge na Sraithe Sóisearaí agus ar theagasc agus/nó taighde ábhartha eile sa litríocht. Chomh maith leis na critéir thuas, déanfar machnamh ar chomhthéacs scoile an iarratasóra. Roghnófar deichniúr múinteoirí (5 T1, 5 T2) chun an grúpa oibre a bhunú. Tá tuilleadh eolais agus an fhoirm léirithe spéise ar fáil ag an nasc seo. 

Tá imlitir 0015/2023 eisithe ag an Roinn Oideachais dar teideal ‘Leasuithe ar shonraíochtaí Gaeilge T1 agus T2 na Sraithe Sóisearaí agus socruithe measúnaithe do Mheasúnuithe Rangbhunaithe 1 agus 2 (Do chohóirt scoláirí 2022/25 agus 2023/26)’. Tá an imlitir ar fáil ag an nasc seo: https://tinyurl.com/y6rmw3dp 

Straitéisí Múinteoireachta á Roinnt
Am: 17:00 - 18:00 Dáta: Dé Máirt 28/03/2023

Ócáid ar líne í seo atá dírithe ar thaithí agus ar chleachtas ranga an mhúinteora. Léireoidh múinteoirí straitéisí éifeachtacha óna gcleachtais ranga. Beidh deis ag rannpháirtithe na straitéisí a phlé.

Chun clárú don cheardlann cliceáil anseo: Clárúchán

Chun breathnú ar an bpóstaer cliceáil anseo: Póstaer

Tá comhairliúchán poiblí ar siúl ag an Roinn Oideachais faoi láthair chun polasaí nua don oideachas lán-Ghaeilge lasmuigh den Ghaeltacht a fhorbairt. Tá ceistneoir ar líne agus aighneachtaí scríofa mar chuid de thréimhse a haon den chomhairliúchán. Ba é an spriocdháta a bhí luaite leis na ceistneoirí agus leis na haighneachtaí scríofa ná 16 Eanáir 2023. Mar thoradh ar iarratais ó pháirtithe leasmhara, rinneadh cinneadh síneadh a chur leis an spriocdháta d’aighneachtaí scríofa go dtí Dé Luain, 30 Eanáir 2023. Is féidir aighneachtaí scríofa a sheoladh chuig POLG@education.gov.ie. Beidh Dé Luain seo chugainn, 16 Eanáir 2023 fós mar spriocdháta do fhreagraí ar an gceistneoir. Comhlánaigh ceistneoir ar líne anseo

Dátaí tábhachtacha amach anseo:

Spriocdháta don cheistneoir – Dé Luain, 16 Eanáir 2023

Spriocdháta d’aighneachtaí scríofa – Dé Luain, 30 Eanáir 2023

Níos mó eolais ar fáil anseo.

Tá an Tionól Teagaisc ag teannadh linn! Comhghairdeas lenár gcomhghleacaithe SFGM Gaeilge as an ócáid bhreá a sholáthar do mhúinteoirí Gaeilge na tíre. Beidh Foireann Ghaeilge SSM ann chomh maith. Táimid ag tnúth go mór le castáil oraibh ann. Is féidir clárú anseo. 

D’eisigh an Roinn Oideachais Socruithe Measúnachta do na Scrúduithe Teastais sa tseachtain dar tús 5 Meán Fómhair. Tugann an doiciméad seo cur síos ar an treoir atá ar fáil do gach ábhar do scoileanna agus do scoláirí. Léirítear nach ndéanfar an Tasc Measúnaithe a mheas mar ghné mheasúnaithe do scoláirí sa tríú bliain reatha (2022/2023). Cuirtear in iúl chomh maith go bhféadfadh éagsúlacht a bheith in ábhar agus leagan amach na scrúdpháipéar ó bhliain go bliain.

Tá dátaí agus socruithe athbhreithnithe maidir leis na Measúnuithe Rangbhunaithe don chohórt scoláirí sa tríú bliain reatha (2022/2023) foilsithe ag CNCM. Ar fáil anseo.